Cəbrayıl rayonunda əməyin mühafizəsi ilə bağlı növbəti maarifləndirmə tədbirləri keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin tabeliyindəki Əməyin Mühafizəsi Mərkəzinin təşkilatçılığı ilə Cəbrayıl rayonunda növbəti maarifləndirmə tədbirləri baş tutub.

Bu tədbirlər işğaldan azad edilmiş ərazilərdə fəaliyyət göstərən müəssisələrdə layiqli əməyin təmin olunmasına dövlət dəstəyinin davamı olaraq həyata keçirilib.

Cəbrayıl rayonunda keçirilən növbəti 2 maarifləndirmə tədbirində ümumilikdə 7 müəssisədən 85 nəfər rəhbər və işçi heyəti iştirak edib.

Mərkəz tərəfindən işəgötürənlərə əməyin mühafizəsi və iş yerlərinin attestasiyası sahəsində təqdim edilən xidmətlər barədə ətraflı məlumat verilib. Eyni zamanda, bu sahədə əməyin mühafizəsi sahəsində təsdiq edilmiş yeni dövlət standartları işəgötürənlərin diqqətinə çatdırılıb.

Tədbirlər zamanı iştirakçılar dövlətin layiqli əmək siyasəti, əmək qanunvericiliyinin əsas tələbləri, iş yerlərində təhlükəsizlik standartları və mina təhlükəsizliyi qaydaları barədə ətraflı şəkildə məlumatlandırılıblar. Həmçinin tədbiri təşkil edən qurumların fəaliyyət istiqamətləri və əmək münasibətlərinin tənzimlənməsinə verdikləri dəstək haqqında da geniş izahat verilib.

Maarifləndirmə tədbirləri çərçivəsində iştirakçılara yaddaş kitabçaları, bukletlər və digər təlimat xarakterli materiallar təqdim olunub, həmçinin onların sualları cavablandırılıb.

Tədbirlərdə Dövlət Əmək Müfəttişliyi Xidməti, Azərbaycan Respublikasının Minatəmizləmə Agentliyi, Beynəlxalq Avrasiya Mətbuat Fondu, Kiçik və Orta Biznesin İnkişafı Agentliyinin nümayəndələri iştirak edib.

Bu cür maarifləndirici tədbirlərin yaxın gələcəkdə digər azad edilmiş ərazilərdə də keçirilməsi planlaşdırılır.