DƏMX DOST könüllüləri üçün infotur təşkil edib

“DOST to DOST”  layihəsinin “Əmək hüquqları” adlı növbəti təlim proqramı da yekunlaşıb. “Əmək hüquqları” adlı təlim proqramı Dövlət Əmək Müfəttişliyi Xidməti (DƏMX) ilə “Könüllü DOST” proqramının təşkilatçılığı ilə həyata keçirilib. “DOST to DOST” layihəsinin həyata keçirilməsində əsas məqsəd gənclərin fərdi inkişafına dəstək olmaq, həmçinin onların asudə vaxtlarının səmərəli təşkil olunmasını təmin etməkdir. Proqram çərçivəsində könüllülərə əmək qanunvericiliyinə dair 5 mövzu üzrə interaktiv təlimlər keçirilib. İnteraktiv formada təşkil edilən təlimlərdə mövzular könüllülərə təqdimatlar vasitəsilə izah olunub.

Təlimlərin yekununu olaraq seminarları uğurla başa vuran DOST könüllüləri üçün əməyin mühafizəsi və təhlükəsizliyinin təmini sahəsində nümunəvi müəssisələrdən biri olan “Azerfloat” QSC-də infotur təşkil edilib.

Müəssisədə təhlükəsizlik qaydaları ilə bağlı təlimatla tanış olduqdan sonra istehsalat barədə ətraflı məlumat alan könüllülər prosesi yaxından izləmək üçün real iş şəraiti ilə yaxından tanış olublar.

Qeyd edək ki, DƏMX-in tabeliyindəki Əməyin Mühafizəsi Mərkəzi ilə “Azerfloat” QSC arasında imzalanmış əməkdaşlıq sənədi əsasında  həmin şirkətdə əməyin mühafizəsi normaları, standartları və qaydalarının tətbiqi, işçilərin əməyin mühafizəsi üzrə təlimatlandırılması və risklərin idarə olunması istiqamətində birgə işlər aparılıb. Bununla da müəssisədə işçilər üçün əməyin mühafizəsi və texniki təhlükəsizlik üzrə nümunəvi şəraitin yaradılması təmin edilib.