Rəqəmsal məkanda uşaqların əmək istismarı risklərinə dair müzakirələr aparılıb

Ailə, Qadın və Uşaq Problemləri üzrə Dövlət Komitəsinin təşkilatçılığı ilə “Uşaqların kiber mühitdə müdafiəsi və rəqəmsal təhlükələrə qarşı birgə fəaliyyət” mövzusunda dəyirmi masa keçirilib.

Tədbirin məqsədi uşaqların rəqəmsal təhlükələrdən müdafiəsi, dövlət və vətəndaş cəmiyyəti institutları arasında koordinasiyalı əməkdaşlığın gücləndirilməsi və bu istiqamətdə mövcud çağırışlara dair birgə həll yollarının müzakirəsi olub.

Dəyirmi masada çıxış edən Dövlət Əmək Müfəttişliyi Xidməti Daxili nəzarət və normativ hüquqi sənədlərlə iş şöbəsinin müdir müavini Günel Baxşiyeva onlayn platformalarda uşaqların əmək fəaliyyəti ilə bağlı qarşılaşa biləcəyi əsas təhlükələrə diqqət çəkib. O, rəqəmsal məkanda əmək istismarı riskləri, bu halların yaranma səbəbləri və qarşısının alınması üçün Xidmət tərəfindən həyata keçirilən tədbirlər barədə məlumat verib.

Tədbir çərçivəsində həmçinin Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva, Daxili İşlər Nazirliyi, Rəqəmsal İnkişaf və Nəqliyyat Nazirliyi, Elm və Təhsil Nazirliyi, Audiovizual Şura və digər qurumların nümayəndələri mövzu üzrə çıxış edərək aktual rəqəmsal təhdidlər və onların qarşısının alınması yolları ilə bağlı fikir mübadiləsi aparıblar.

Müzakirələr zamanı uşaqların təhlükəsiz mühitdə inkişafının təmin olunması məqsədilə hüquqi çərçivənin təkmilləşdirilməsi, maarifləndirmə tədbirlərinin davamlı həyata keçirilməsi, valideynlərin və müəllimlərin bu sahədə maariflənməsinin artırılması istiqamətində vacib tövsiyələr irəli sürülüb.