Sosial tərəfdaşlarla görüş olub

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətində Azərbaycan Həmkarlar İttifaqları Konfederasiyası (AHİK) və Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının nümayəndələri ilə görüş keçirilib.

Görüşdə qurumlar arasında bağlanılmış tədbirlər planının icrası istiqamətində müzakirələr aparılıb. Gələcəkdə bu işlərin əhatə dairəsinin genişləndirilməsi və mütəmadi xarakter daşıması barədə razılıq əldə edilib.

Əmək qanunvericiliyinin təkmilləşdirilməsinə dair təkliflərin müzakirəsi, əmək hüquqları sahəsində birgə maarifləndirmə işlərinin aparılması, istehsalatda baş verən bədbəxt hadisələr ilə bağlı qabaqlayıcı tədbirlərin görülməsi üzrə müzakirə aparılıb. 

Müvafiq sahələrdə innovativ həllərin geniş tətbiqi işləri, “Əmək və Məşğulluq” altsisteminin üstünlükləri və faydaları diqqətə çatdırılıb. Əməyin mühafizəsi ilə bağlı milli qanunvericilik, iş yerlərində sağlam və təhlükəsiz əmək şəraitinin təmin edilməsi, əməyin mühafizəsi üzrə milli standartların hazırlanması sahəsində aparılan işlər qeyd edilib. 

Bundan əlavə görüşdə, Əməyin Mühafizəsi Mərkəzinin işəgötürənlərə əməyin mühafizəsi və iş yerlərinin attestasiyası sahələrində xidmətlərin göstərilməsində, metodiki dəstəyin təmin edilməsində mühüm rol oynadığı vurğulanıb.

Sonda görüş iştirakçıları növbəti mərhələ üzrə birgə tədbirləri razılaşdırıb və bu kimi görüşlərin intensivliyinin artırılmasının önəmini vurğulayıblar.