Abşeron-Xızı regional şöbəsi tərəfindən işəgötürənlər üçün maarifləndirmə tədbiri keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin Abşeron-Xızı regional şöbəsi tərəfindən işəgötürənlər üçün maarifləndirmə tədbiri təşkil olunub.

“İstehsalatda baş verən bədbəxt hadisələrdən icbari sığorta” və “İş yerlərində əməyin mühafizəsi” mövzularına həsr olunmuş tədbirdə dövlət və özəl sektoru təmsil edən müəssisə və təşkilatların 40-dan çox nümayəndəsi iştirak edib.

Çıxışlarda Dövlət Əmək Müfəttişliyi Xidməti tərəfindən keçirilən maarifləndirmə tədbirlərinin əhəmiyyəti vurğulanıb, əmək qanunvericiliyinin tələblərinə əməl olunmasının vacibliyi diqqətə çatdırılıb.

Tədbir çərçivəsində istehsalatda baş verən bədbəxt hadisələrdən icbari sığortanın tətbiq mexanizmi, işəgötürənlərin öhdəlikləri, eləcə də iş yerlərində əməyin mühafizəsinin təmin edilməsinin əhəmiyyəti iştirakçılara izah edilib.

Həmçinin Əməyin Mühafizəsi Mərkəzinin fəaliyyət istiqamətləri və bu sahədə görülən işlər barədə məlumat verilib, müəssisələrdə əməyin mühafizəsi üzrə norma və standartların tətbiqinə göstərilən dəstək, eləcə də yeni qəbul edilmiş tələblər iştirakçıların diqqətinə çatdırılıb. Eyni zamanda gender bərabərliyinin təşviqi və qadınların qeyri-formal məşğulluğunun azaldılması istiqamətində həyata keçirilən maarifləndirmə tədbirləri barədə məlumat verilib.

Tədbirin sonunda iştirakçıların sualları cavablandırılıb.