Abşeron-Xızı regional şöbəsi uşaqların əmək hüquqları və əməyin mühafizəsi üzrə işəgötürənlər üçün maarifləndirmə tədbiri keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin Abşeron-Xızı regional şöbəsi tərəfindən maarifləndirmə tədbiri keçirilib.

Tədbir Azərbaycan Respublikasının İnsan Hüquqları üzrə Müvəkkili (Ombudsman) tərəfindən 18 may – 18 iyun 2026-cı il tarixlərinin “İnsan Hüquqları Aylığı” elan edilməsi ilə əlaqədar təşkil olunub. Tədbirdə 50-yə yaxın işəgötürən və onların nümayəndəsi iştirak edib.

Maarifləndirmə tədbiri “Uşaqların əmək hüquqları, məcburi əmək və insan alverinin qarşısının alınması” və “İş yerlərində əməyin mühafizəsi” mövzularına həsr olunub.

Tədbir zamanı iştirakçılara uşaqların əmək hüquqları, məcburi əməyin və insan alverinin qarşısının alınması, əmək qanunvericiliyinə edilmiş son dəyişikliklər, eləcə də iş yerlərində əməyin mühafizəsinin təşkili barədə məlumat verilib. Həmçinin əməyin mühafizəsi sahəsində qanunvericiliyin tələbləri, təhlükəsizlik qaydaları, iş yerlərinin attestasiyası və dövlət standartları ilə bağlı ətraflı izahat təqdim olunub.

Sonda iştirakçıların sualları cavablandırılıb və mövzu ətrafında fikir mübadiləsi aparılıb.