Azərbaycan və İndoneziya arasında əməkhaqqı sisteminin inkişafı üzrə videokonfrans keçirilib

Azərbaycan və İndoneziya arasında əməkhaqqı sisteminin inkişafı üzrə videokonfrans formatında görüş keçirilib.

Görüşdə Azərbaycan Respublikasının Əmək və Əhalinin Sosial Müdafiəsi Nazirliyi, Nazirlik yanında Dövlət Əmək Müfəttişliyi Xidməti, İndoneziya Respublikasının İşçi Qüvvəsi Nazirliyinin rəhbər və əməkdaşları iştirak edib.

Müzakirələr məhsuldar əməyin təşviqinə yönəlmiş əməkhaqqı sisteminin inkişafı üzrə mexanizmlərin formalaşdırılması və tətbiqi mövzusuna həsr olunub.

Görüş zamanı əməkdaşlığın əhəmiyyəti vurğulanıb, əmək qanunvericiliyi sahəsində aparılan son islahatlar, planlaşdırılan layihələr və Anlaşma Memorandumu çərçivəsində nəzərdə tutulan gələcək əməkdaşlıq istiqamətləri müzakirə edilib.

Eyni zamanda, İndoneziyada bu sahədə son illərdə həyata keçirilən islahatlar və tətbiq olunan mexanizmlər barədə məlumat təqdim olunub, habelə Dövlət Əmək Müfəttişliyi Xidmətinin fəaliyyəti və “Əmək və Məşğulluq” altsistemi (ƏMAS) barədə təqdimat keçirilib.

Görüş zamanı qarşılıqlı maraq doğuran məsələlər ətrafında fikir mübadiləsi aparılıb, əməkdaşlığın davam etdirilməsi və növbəti sessiyaların təşkili ilə bağlı razılıq əldə olunub.

Qeyd edək ki, görüş Azərbaycan Respublikası Prezidentinin 3 iyun 2023-cü il tarixli 2165 nömrəli Fərmanı ilə təsdiq edilmiş “Azərbaycan Respublikasının Əmək və Əhalinin Sosial Müdafiəsi Nazirliyi ilə İndoneziya Respublikasının İşçi Qüvvəsi Nazirliyi arasında əmək, məşğulluq və sosial müdafiə sahələrində əməkdaşlıq haqqında Anlaşma Memorandumu”nun icrası çərçivəsində keçirilib.