“Bakı Metropoliteni” QSC-nin əməkdaşları üçün əməyin mühafizəsi üzrə təlim keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən “Bakı Metropoliteni” QSC-də əməyin mühafizəsinə dair təlim təşkil olunub. Təlimin keçirilməsində məqsəd istehsalatda bədbəxt hadisələrin qarşısının alınması, peşə risklərinin qiymətləndirilməsi və iş yerlərində təhlükəsiz davranış qaydalarına əməl olunmasının təşviq edilməsi olub. 

Tədbirdə “Bakı Metropoliteni” QSC-nin müxtəlif struktur bölmələrindən 35 əməkdaş iştirak edib. Təlim zamanı iş yerlərində mövcud risklərin müəyyənləşdirilməsi, təhlükəli və zərərli istehsalat amillərinin təsirinin azaldılması, fərdi mühafizə vasitələrindən düzgün istifadə, iş vaxtı rejiminə əməl olunması və təhlükəsiz əmək şəraitinin təmin edilməsi ilə bağlı ətraflı məlumat verilib.

Bununla yanaşı, təlim çərçivəsində “Vision Zero” konsepsiyasının təhlükəsizlik, sağlamlıq və rifah prinsipləri barədə məlumat təqdim olunub, iş yerlərində risklərin qarşısının alınmasının və sağlam əmək mühitinin formalaşdırılmasının əhəmiyyəti iştirakçıların diqqətinə çatdırılıb. Həmçinin əməyin mühafizəsi sahəsində qabaqlayıcı tədbirlərin gücləndirilməsi ilə bağlı praktiki tövsiyələr verilib.

Qeyd edək ki, Dövlət Əmək Müfəttişliyi Xidməti tərəfindən keçirilən bu cür maarifləndirici tədbirlər iş yerlərində əmək təhlükəsizliyi mədəniyyətinin formalaşdırılmasına, profilaktik yanaşmanın gücləndirilməsinə və istehsalatda bədbəxt hadisələrin minimuma endirilməsinə xidmət edir.