Bakıda “5-ci İllik Əməyin Təhlükəsizliyi və Sağlamlığı Konfransı” keçirilib

28 Aprel – Ümumdünya Əməyin Təhlükəsizliyi və Sağlamlığı Gününə həsr olunmuş “5-ci İllik Əməyin Təhlükəsizliyi və Sağlamlığı Konfransı” Bakıda keçirilib.

İslam Əməkdaşlıq Təşkilatının Əmək Mərkəzi və “Risk Menecment Peşəkarları” İctimai Birliyinin əməkdaşlığı ilə təşkil olunan konfransın məqsədi əməyin təhlükəsizliyi və sağlamlığı sahəsində maarifləndirmənin gücləndirilməsi, qabaqcıl təcrübələrin paylaşılması, müasir yanaşmaların təşviqi, bu istiqamətdə yerli və beynəlxalq əməkdaşlığın genişləndirilməsidir.

Tədbirdə çıxış edən İslam Əməkdaşlıq Təşkilatının Əmək Mərkəzinin baş direktoru Azər Bayramov əməyin təhlükəsizliyi və sağlamlığının müasir əmək münasibətlərinin əsas sütunlarından biri olduğunu vurğulayıb. O qeyd edib ki, bu sahə yalnız iş yerlərində risklərin azaldılması ilə məhdudlaşmır, eyni zamanda insan həyatının və sağlamlığının qorunmasına, əmək məhsuldarlığının artırılmasına, dayanıqlı iş mühitinin formalaşdırılmasına və sosial-iqtisadi inkişafın möhkəmləndirilməsinə xidmət edir.

Dövlət Əmək Müfəttişliyi Xidmətinin rəisi Vəli Quliyev çıxışı zamanı əməyin mühafizəsi sahəsində son illər həyata keçirilən sistemli tədbirlər, o cümlədən elektron reyestrlərin yaradılması, audit mexanizmlərinin tətbiqi, genişmiqyaslı təlim və maarifləndirmə proqramlarının icrası barədə məlumat verib. O bildirib ki, bu istiqamətdə normativ-hüquqi bazanın təkmilləşdirilməsi və işəgötürənlərə metodiki dəstəyin gücləndirilməsi təhlükəsiz və sağlam əmək mühitinin formalaşdırılmasına xidmət edir. V.Quliyev vurğulayıb ki, həyata keçirilən layihələr və qanunvericilik dəyişiklikləri çərçivəsində preventiv və proaktiv yanaşma gücləndirilir.

Daha sonra çıxış edən Beynəlxalq Əmək Təşkilatının Azərbaycan üzrə əlaqələndiricisi Yaşar Həmzəyev və millət vəkili Pərvanə Vəliyeva konfransın əməyin təhlükəsizliyi və sağlamlığı sahəsində maarifləndirmənin gücləndirilməsi, qabaqlayıcı yanaşmaların təşviqi, eləcə də yerli və beynəlxalq əməkdaşlığın inkişafı baxımından əhəmiyyətini vurğulayıblar. Bildirilib ki, tədbirin geniş beynəlxalq iştirakçılıq səviyyəsi onun peşəkar və institusional əhəmiyyətini daha da artırır.

Tədbir çərçivəsində panel müzakirələri keçirilib. Müzakirələr zamanı əməyin mühafizəsi mədəniyyətinin inkişafı, SƏTƏM sahəsində mövcud çağırışlar, risklərin effektiv idarə olunması, keyfiyyət standartlarının tətbiqi, qabaqlayıcı yanaşmaların gücləndirilməsi və iş yerlərində təhlükəsizliyin təmininə dair praktik həllər ətrafında fikir mübadiləsi aparılıb.

Sonda interaktiv qrup fəaliyyəti və bilik müsabiqəsi təşkil olunub. Bu format iştirakçılara praktiki situasiyaları qiymətləndirmək, fikir mübadiləsi aparmaq və peşəkar yanaşmalarını nümayiş etdirmək imkanı yaradıb. Müsabiqədə yüksək nəticə göstərən iştirakçılar mükafat və sertifikatlarla təltif olunublar.