Bakıda işəgötürənlərə qeyri-formal məşğulluq və əməyin mühafizəsi mövzusunda maarifləndirmə keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən Bakı şəhəri üzrə işəgötürənlər üçün “Qeyri-formal məşğulluğun qarşısının alınması” və “İş yerlərində əməyin mühafizəsi” mövzularında maarifləndirmə tədbiri təşkil olunub.

Tədbirdə dövlət və özəl sektoru təmsil edən müəssisə və təşkilatların 125 nümayəndəsi iştirak edib.

Çıxışlarda Dövlət Əmək Müfəttişliyi Xidməti tərəfindən mütəmadi keçirilən maarifləndirmə tədbirlərinin əhəmiyyəti vurğulanıb, əmək qanunvericiliyinin tələblərinə əməl olunmasının vacibliyi diqqətə çatdırılıb.

Qeyri-formal məşğulluğun qarşısının alınması mövzusu üzrə əmək münasibətlərinin rəsmiləşdirilməsinin vacibliyi barədə məlumat verilib. Əmək müqaviləsi bağlanmadan işçilərin işə cəlb edilməsinin doğurduğu nəticələrə toxunulub. Bildirilib ki, bu halda işçilər sosial sığorta, əmək stajının uçotu, məzuniyyət və qanunvericilikdə nəzərdə tutulan digər təminatlardan məhrum olurlar. İşəgötürənlər isə müvafiq hüquqi məsuliyyətlə üzləşirlər. Əmək müqaviləsi bildirişlərinin “Əmək müqaviləsi” elektron informasiya sisteminə vaxtında daxil edilməsinin əhəmiyyəti də izah edilib. Həmçinin qeyri-formal məşğulluğa görə qanunvericilikdə nəzərdə tutulan məsuliyyət barədə məlumat verilib.

Əməyin mühafizəsi mövzusu üzrə bu sahədə qanunvericiliyin tələbləri və işəgötürənlərin təhlükəsiz əmək şəraitinin yaradılması ilə bağlı öhdəlikləri diqqətə çatdırılıb. İştirakçılara Əməyin Mühafizəsi Mərkəzinin fəaliyyəti, əməyin mühafizəsi normaları, qaydaları və prinsipləri barədə məlumat verilib. Bundan əlavə, iş yerlərinin attestasiyasının keçirilməsi qaydaları və onun iş şəraitinin qiymətləndirilməsində rolu izah olunub. Yeni qəbul edilmiş dövlət standartları və onların iş yerlərində tətbiqi barədə də ətraflı məlumat verilib.

Tədbirin sonunda iştirakçıları maraqlandıran suallar cavablandırılıb və mövzulara dair fikir mübadiləsi aparılıb.