Bərdədə ƏMAS-ın imkanları və əməyin mühafizəsi mövzusunda maarifləndirmə tədbiri keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti Bərdə şəhərində maarifləndirmə tədbiri təşkil edib.

“Əmək və Məşğulluq” altsisteminin (ƏMAS) imkanları və yenilikləri” və “İş yerlərində əməyin mühafizəsi” mövzularına həsr olunmuş tədbirdə Qarabağ regionunda fəaliyyət göstərən dövlət və özəl sektoru təmsil edən 35 işəgötürənin 60-a yaxın nümayəndəsi iştirak edib.

Çıxışlarda ƏMAS-ın imkanları və yeniliklərindən, tətbiq olunan yeni funksionallıqlardan bəhs edilib. İşəgötürənlər tərəfindən məlumatların daxil edilməsi zamanı yol verilən texniki xətaların aradan qaldırılması və bu istiqamətdə göstərilən dəstək geniş müzakirə olunub. Vakant və yeni yaradılmış iş yerləri barədə məlumatların vakansiya bankına daxil edilərkən nəzərə alınmalı məqamlar diqqətə çatdırılıb, vakansiya bankının işəgötürənlər üçün yaratdığı imkan və üstünlüklər izah olunub.

Tədbirdə iş yerlərində əməyin mühafizəsinin təşkili məsələlərinə də toxunulub. Əməyin mühafizəsi sahəsində dövlət standartlarının tətbiqinin təhlükəsizlik səviyyəsinin yüksəldilməsindəki rolu, sağlam və təhlükəsiz əmək şəraitinin yaradılmasının əhəmiyyəti, eləcə də “Vision Zero” konsepsiyasının əsas prinsipləri çatdırılıb.

Tədbirin sonunda iştirakçıların sualları cavablandırılıb, fikir mübadiləsi aparılıb.