Bu ilin yekun maarifləndirmə tədbiri keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən 2025-ci il üzrə sonuncu maarifləndirmə tədbiri təşkil olunub.

Bərdə rayonunda keçirilən tədbir “İş vaxtının növləri, iş vaxtının rejimi və iş vaxtından artıq vaxtda işin tənzimlənməsi qaydaları”, eləcə də “İş yerlərində əməyin mühafizəsi” mövzularına həsr edilib. Tədbirdə Xidmətin Şərqi Zəngəzur regional şöbəsinin əhatə etdiyi rayonlardan dövlət və özəl sektora aid müəssisə və təşkilatları təmsil edən 40-dan artıq nümayəndə iştirak edib.

Çıxışlar zamanı Dövlət Əmək Müfəttişliyi Xidməti tərəfindən mütəmadi olaraq keçirilən maarifləndirmə tədbirlərinin əmək münasibətlərinin düzgün tənzimlənməsində mühüm rol oynadığı vurğulanıb, əmək qanunvericiliyinin tələblərinə əməl olunmasının əhəmiyyəti diqqətə çatdırılıb.

Eyni zamanda Əməyin Mühafizəsi Mərkəzinin fəaliyyət istiqamətləri, müəssisələrdə əməyin mühafizəsi üzrə standart və normaların tətbiqi sahəsində göstərilən metodiki dəstək, habelə yeni qəbul edilmiş standartlar barədə iştirakçılara ətraflı məlumat verilib.

Tədbirin sonunda mövzularla bağlı iştirakçıların sualları cavablandırılıb, fikir mübadiləsi aparılıb.

Qeyd edək ki, cari il ərzində Xidmətin təsdiq olunmuş Tədbirlər Planına uyğun olaraq Bakı şəhəri, Naxçıvan Muxtar Respublikası və regionlar üzrə ümumilikdə 59 maarifləndirmə tədbiri keçirilib.