DƏMX-də “Ticarət Şəbəkələrinin İnkişafı” İctimai Birliyinin nümayəndələri ilə əmək münasibətlərinə dair görüş keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətində “Ticarət Şəbəkələrinin İnkişafı” İctimai Birliyinin nümayəndələri ilə görüş keçirilib.

Görüşdə ticarət şəbəkələri sektorunda fəaliyyət göstərən şirkətlərdə əmək qanunvericiliyinin tətbiqi, əmək münasibətlərinin tənzimlənməsi, inzibati məsuliyyət məsələləri, eləcə də işəgötürənlərin qarşılaşdıqları hüquqi çətinliklər müzakirə olunub.

Tərəflər əmək qanunvericiliyinin tələblərinin düzgün tətbiqi, hüquq pozuntularının qarşısının alınması, işəgötürənlərin maarifləndirilməsi istiqamətində fikir mübadiləsi aparıblar.

Həmçinin görüş zamanı Xidmətin “DOST Müfəttiş” layihəsi barədə məlumat verilib. Bildirilib ki, layihə çərçivəsində müəssisələrdə əmək qanunvericiliyinə uyğunluğun qiymətləndirilməsi, əməyin mühafizəsi sisteminin təkmilləşdirilməsi, insan resurslarının idarə olunması proseslərinin düzgün təşkili və mümkün risklərin əvvəlcədən müəyyənləşdirilməsi istiqamətində dəstək göstərilir.

Eyni zamanda Xidmətin mühüm təşəbbüslərindən biri olan “Nümunəvi müəssisə” layihəsi barədə də danışılıb. Qeyd olunub ki, layihə çərçivəsində seçilmiş müəssisələrdə təhlükəsiz və sağlam əmək şəraitinin yaradılması, əldə olunmuş uğurlu təcrübənin digər müəssisələr tərəfindən öyrənilməsi və tətbiqinin təşviqi nəzərdə tutulur.