Dövlət Əmək Müfəttişliyi Xidməti bu il 29 beynəlxalq mükafata layiq görülüb

2025-ci il ərzində Dövlət Əmək Müfəttişliyi Xidmətinin fəaliyyəti beynəlxalq platformalarda yüksək qiymətləndirilib.

Cari ildə Xidmət dünyanın ən nüfuzlu beynəlxalq müsabiqələrində ümumilikdə 29 mükafata layiq görülüb. Bu mükafatlardan 12-si ABŞ-də, 12-si Böyük Britaniyada, 2-si Hindistanda, 3-ü isə Sinqapurda keçirilən beynəlxalq müsabiqələr çərçivəsində əldə edilib.

Dövlət Əmək Müfəttişliyi Xidməti əmək münasibətlərinin tənzimlənməsi, əməyin mühafizəsi, rəqəmsal transformasiya, innovativ texnoloji və insan resursları həllərinin tətbiqi, hökumət və yaşıl texnologiyalar, korporativ sosial məsuliyyət, eləcə də maarifləndirici kommunikasiya sahələrində həyata keçirdiyi uğurlu təşəbbüslərlə beynəlxalq ekspertlər tərəfindən yüksək dəyərləndirilib və bu istiqamətlər üzrə fərqlənərək adını qaliblər sırasına yazdırıb.