Dövlət Əmək Müfəttişliyi Xidməti tərəfindən “Qeyri-formal məşğulluğun qarşısının alınması” mövzusunda ictimai dinləmə keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin Lənkəran-Astara regional şöbəsi tərəfindən qeyri-hökumət təşkilatlarının nümayəndələrinin iştirakı ilə ictimai dinləmə keçirilib.

“Qeyri-formal məşğulluğun qarşısının alınması” mövzusuna həsr olunan ictimai dinləmədə 26 qeyri-hökumət təşkilatının nümayəndəsi iştirak edib.

Tədbirdə qeyri-formal məşğulluğun işçilərin əmək və sosial təminat hüquqlarına, eləcə də işəgötürənlərin iqtisadi mənafelərinə və müəssisələrin fəaliyyətinə mənfi təsirləri barədə məlumat verilib. Bildirilib ki, əmək münasibətlərinin əmək müqaviləsi bağlanılmadan rəsmiləşdirilməməsi işçilərin qanunvericiliklə müəyyən edilmiş əmək və sosial təminat hüquqlarından yararlanmasına mane olur.

Qeyri-formal məşğulluğun qarşısının alınmasının və əmək münasibətlərinin leqallaşdırılmasının əhəmiyyəti diqqətə çatdırılıb, bu istiqamətdə həm işçilərin, həm də işəgötürənlərin fəal iştirakının vacibliyi vurğulanıb.

İctimai dinləmə zamanı mövzu ilə bağlı məruzə təqdim olunub, iştirakçıların rəy və təklifləri dinlənilib, onları maraqlandıran suallar cavablandırılıb.