Dövlət Əmək Müfəttişliyi Xidmətinin əməkdaşları Qubada şəhid ailələrini ziyarət ediblər

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin əməkdaşları 44 günlük Vətən müharibəsində Azərbaycanın ərazi bütövlüyünün təmin edilməsi uğrunda gedən döyüş əməliyyatlarında şəhid olmuş kapitan Aqil Məlikovun, gizir Orxan Balayevin və müddətdən artıq həqiqi hərbi xidmət keçən əsgər Mehdi Murtuzovun Qubada yaşayan ailələrini ziyarət ediblər.

Azərbaycan Respublikasının Quru Qoşunlarının kapitanı Aqil Məlikov 27 sentyabr 2020-ci ildə Füzuli istiqamətində gedən döyüşlərdə qəhrəmancasına şəhid olub. Azərbaycan Respublikasının Prezidenti İlham Əliyevin Sərəncamlarına əsasən Aqil Məlikov ölümündən sonra “Vətən uğrunda”, “Füzulinin azad olunmasına görə”, “İgidliyə görə” medalları və “Azərbaycan Bayrağı” ordeni ilə təltif edilib.

Quru Qoşunlarının giziri Orxan Balayev 8 oktyabr 2020-ci ildə Suqovuşan istiqamətində gedən döyüşlərdə şəhidlik zirvəsinə ucalıb. Prezident İlham Əliyevin Sərəncamlarına əsasən Orxan Balayev ölümündən sonra “Vətən uğrunda”, “Suqovuşanın azad olunmasına görə” və “Cəsur döyüşçü” medalları ilə təltif olunub.

Quru Qoşunlarının müddətdən artıq həqiqi hərbi xidmət keçən hərbi qulluqçusu, əsgər Mehdi Murtuzov 2 oktyabr 2020-ci ildə Murovdağ–Kəlbəcər istiqamətində gedən döyüşlərdə şəhid olub. Prezident İlham Əliyevin Sərəncamlarına əsasən Mehdi Murtuzov ölümündən sonra “Vətən uğrunda”, “İgidliyə görə” və “Kəlbəcərin azad olunmasına görə” medalları ilə təltif edilib.

Ziyarət zamanı şəhid ailələri ilə səmimi söhbət aparılıb, qəhrəman Vətən oğullarının keçdiyi şərəfli döyüş yolundan bəhs olunub və onların əziz xatirəsinin xalqımızın yaddaşında daim yaşayacağı vurğulanıb. Ailələrin sosial vəziyyəti ilə maraqlanılıb, onların qayğı və ehtiyacları dinlənilib.

Görüşdə qeyd edilib ki, şəhid ailələrinə göstərilən dövlət qayğısı ölkə rəhbərliyinin fəaliyyətində hər zaman prioritet istiqamətlərdən biridir. Dövlət tərəfindən şəhid ailələrinin sosial rifahının yaxşılaşdırılması və onların daim diqqət mərkəzində saxlanılması istiqamətində tədbirlərin davam etdiriləcəyi vurğulanıb.