“Əmək münasibətlərində gender bərabərliyi - bərabər hüquqlar və bərabər imkanlar” adlı tədbir keçirilib

Azərbaycan Respublikasının Əmək və Əhalinin Sosial Müdafiəsi Nazirliyi, Nazirlik yanında Dövlət Əmək Müfəttişliyi Xidməti və Naxçıvan Muxtar Respublikasının Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin təşkilatçılığı ilə “Əmək münasibətlərində gender bərabərliyi - bərabər hüquqlar və bərabər imkanlar” adlı tədbir keçirilib.

Muxtar respublikada fəaliyyət göstərən qadın əməyinin az tətbiq edildiyi 29 müəssisənin 70-dən artıq nümayəndəsinin iştirakı ilə keçirilən tədbirdə Azərbaycan Respublikasının Əmək və Əhalinin Sosial Müdafiəsi Nazirliyinin Aparatının Əmək siyasəti şöbəsinin, Dövlət Məşğulluq Agentliyinin, Naxçıvan Muxtar Respublikası Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin, Məşğulluq Agentliyinin və Naxçıvan Muxtar Respublikasının Həmkarlar İttifaqları Şurasının nümayəndələri çıxış edərək ölkədə qadınların məşğulluq imkanlarının genişləndirilməsi üçün işəgötürənlərlə birgə maliyyələşmə tədbirlərinin genişləndirilməsi, gender bərabərliyinin və qadınların daha yüksək əməkhaqqı ödənilən sahələrdə çalışmasının təmin edilməsi, beynəlxalq əmək normalarına uyğun olaraq qadınların hüquqlarının müdafiəsi mövzusunda iştirakçıları məlumatlandırmışdır.

Həmçinin tədbirdə qadın əməyinin tətbiqi ilə bağlı iştirakçılara maarifləndirici slayıdlar nümayiş etdirilmişdir.

Qeyd edək ki, sözügedən tədbir Azərbaycan Respublikasının Əmək və Əhalinin Sosial Müdafiəsi Nazirliyi tərəfindən “Əmək bazarı” işçi qrupunun “2023-cü il üzrə Fəaliyyət Planı”nın icrası və “Qadın əməyinin təşviqi” ilə bağlı regionlarda keçirilməsi nəzərdə tutulan maarifləndirici tədbirlərin birincisidir.