“Əmək sahəsində” standartlaşdırma üzrə Texniki Komitənin növbəti iclasında daha 22 standart müzakirə edilib

 Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin sədrliyi ilə fəaliyyət göstərən “Əmək sahəsində” standartlaşdırma üzrə Texniki Komitənin (AZSTAND/TK21) növbəti iclası keçirilib.

İclas zamanı Texniki Komitənin 2026-cı il üzrə Fəaliyyət Planına uyğun olaraq hazırlanması nəzərdə tutulan standart layihələri müzakirə edilib, eləcədə standartlaşdırma sahəsində fəaliyyətin davamlı olaraq təkmilləşdirilməsinin, əmək təhlükəsizliyi və işçi hüquqlarının qorunmasına xidmət edən müasir standartların hazırlanmasının əhəmiyyəti vurğulanıb.

İclasda 20 yeni standart layihələri üzrə üzvlərin rəy və təklifləri dinlənilib, layihələrin təkmilləşdirilməsi istiqamətində fikirlər səsləndirilib.

Bununla yanaşı, Azərbaycan Respublikası Nazirlər Kabinetinin 2026-cı il 5 fevral tarixli 38 nömrəli Qərarı ilə təsdiq edilmiş “Beynəlxalq, regional, dövlətlərarası və xarici dövlətlərin standartlarının Azərbaycan Respublikasının ərazisində tətbiqi Qaydaları”na əsasən “Azərbaycan Standartlaşdırma İnstitutu” PHŞ tərəfindən təqdim edilmiş 2 yeni standartla bağlı da üzvlər arasında fikir mübadiləsi aparılıb.

Qeyd olunub ki, Texniki Komitənin 2026-cı il üzrə Fəaliyyət Planında ümumilikdə 60 standartın hazırlanması nəzərdə tutulur və bu istiqamətdə işlər mərhələli şəkildə davam etdirilir.

İclasda əmək sahəsində standartlaşdırma işlərinin beynəlxalq təcrübəyə uyğunlaşdırılması, əməyin mühafizəsinin gücləndirilməsi, təhlükəsiz və sağlam əmək şəraitinin təmin olunması, eləcə də insan resurslarının idarə edilməsi sahəsində müasir yanaşmaların tətbiqi ilə bağlı məsələlər də müzakirə olunub.

Sonda müzakirəyə çıxarılmış əmək sahəsində 22 standart layihəsi Texniki Komitənin üzvləri tərəfindən yekdilliklə qəbul edilib və təsdiq olunması üçün aidiyyəti quruma göndərilməsi barədə qərar qəbul edilib.