“Əmək sahəsində” standartlaşdırma üzrə Texniki Komitənin növbəti iclasında daha 5 standart müzakirə edilib

 Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin sədrliyi ilə fəaliyyət göstərən “Əmək sahəsində” standartlaşdırma üzrə Texniki Komitənin (AZSTAND/TK21) növbəti iclası keçirilib.

İclasda Texniki Komitənin 2026-cı il üzrə Fəaliyyət Planına uyğun olaraq hazırlanması nəzərdə tutulan standart layihələri müzakirə edilib.

İclas zamanı “Azərbaycan Standartlaşdırma İnstitutu” PHŞ tərəfindən təqdim edilmiş 5 yeni standart layihəsinə baxılıb. Belə ki, standart layihələri üzrə üzvlərin rəy və təklifləri dinlənilib, layihələrin təkmilləşdirilməsi istiqamətində müzakirələr aparılıb.

Bununla yanaşı, iclas çərçivəsində AZS ISO 30414:2025 “İnsan resurslarının idarə edilməsi — İnsan kapitalına dair hesabatvermə və məlumatların açıqlanması üzrə tələblər və tövsiyələr” standartının dövri yoxlaması ilə bağlı məsələyə də baxılıb. Standartın aktuallığı, tətbiq imkanları və gələcək istifadəsi ilə bağlı üzvlər arasında fikir mübadiləsi aparılıb.

Qeyd olunub ki, Texniki Komitənin 2026-cı il üzrə Fəaliyyət Planında ümumilikdə 60 standartın hazırlanması nəzərdə tutulur və bu istiqamətdə işlər mərhələli şəkildə davam etdirilir.

İclasda əmək sahəsində standartlaşdırma işlərinin beynəlxalq təcrübəyə uyğunlaşdırılması, əməyin mühafizəsinin gücləndirilməsi, təhlükəsiz və sağlam əmək şəraitinin təmin olunması, eləcə də insan resurslarının idarə edilməsi sahəsində müasir yanaşmaların tətbiqi ilə bağlı məsələlər də müzakirə olunub.

Sonda standartlaşdırma sahəsində fəaliyyətin davamlı olaraq təkmilləşdirilməsinin, əmək təhlükəsizliyi və işçi hüquqlarının qorunmasına xidmət edən müasir standartların hazırlanmasının əhəmiyyəti vurğulanıb.