Əməyin mühafizəsi sahəsində beynəlxalq təcrübəyə əsaslanan təlim proqramı başlayıb

Türkiyə Respublikasının Əmək və Sosial Müdafiə Nazirliyinin tabeliyində fəaliyyət göstərən Əmək və Sosial Təminat Təlim və Tədqiqat Mərkəzi (ÇASGEM) tərəfindən Azərbaycan Respublikasının Əmək və Əhalinin Sosial Müdafiəsi Nazirliyi, Nazirlik yanında Dövlət Əmək Müfəttişliyi Xidməti və Xidmətin tabeliyində fəaliyyət göstərən Əməyin Mühafizəsi Mərkəzinin əməkdaşları üçün əməyin mühafizəsinə dair təlim proqramına start verilib.

Təlim proqramı iki mərhələdən ibarətdir. Birinci mərhələdə ÇASGEM-in ekspertləri Burak Ayan və Hasan Ali Yaşa tərəfindən təqdimatlar keçirilib. Təlim iştirakçılarına “Təhlükəsiz və sağlam əmək şəraiti”, “Əməyin mühafizəsi üzrə əsas anlayışlar”, “Əməyin mühafizəsi üzrə Türkiyə qanunvericiliyi və tətbiq edilən standartlar”, “Fərdi mühafizə vasitələri və istifadə müddətləri”, “Yükqaldırma işləri”, “Dəzgahlarla iş”, “Əllə yükqaldırma zamanı yaranan əzələ-skelet narahatlıqları və risklər” və digər mövzular üzrə bilik və bacarıqlar aşılanıb.

Qeyd edək ki, ümumilikdə beş gün davam edəcək təlim proqramı Beynəlxalq Əmək Təşkilatının 155 və 187 nömrəli Konvensiyalarının tələbləri çərçivəsində təşkil olunur. Təlimlərin əsas məqsədi əməyin mühafizəsi sahəsində peşəkar biliklərin artırılması, təhlükəsizlik mədəniyyətinin gücləndirilməsi və beynəlxalq təcrübənin tətbiqinin genişləndirilməsidir.