Əməyin mühafizəsi sahəsində dövlət standartlarının tətbiqi ilə bağlı birgə maarifləndirici tədbir keçirilib

Əməyin mühafizəsi sahəsində dövlət standartlarının tətbiqi və təhlükəsiz əmək mühitinin təşviqi məqsədilə növbəti maarifləndirici tədbir təşkil olunub.

Tədbir Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin tabeliyində fəaliyyət göstərən Əməyin Mühafizəsi Mərkəzi, Azərbaycan Həmkarlar İttifaqları Konfederasiyası, Azərbaycan Sahibkarlar (İşəgötürənlər) Təşkilatları Milli Konfederasiyası (ASK) və Azərbaycan Standartlaşdırma İnstitutu tərəfindən birgə təşkil edilib.

Maarifləndirici tədbirdə əməyin mühafizəsi sahəsində qəbul edilmiş dövlət standartlarının tətbiqi, iş yerlərində təhlükəsiz və sağlam əmək şəraitinin təmin olunması, peşə risklərinin idarə edilməsi, eləcə də “Vision Zero” konsepsiyasının məqsəd və əsas prinsipləri barədə iştirakçılara ətraflı məlumat verilib.

Tədbirdə müxtəlif müəssisələri təmsil edən 25 SƏTƏM mühəndisi iştirak edib. İştirakçılarla əməyin mühafizəsi sahəsində qabaqcıl yanaşmalar, təhlükəsizlik mədəniyyətinin gücləndirilməsi və dövlət standartlarının praktik tətbiqi ilə bağlı fikir mübadiləsi aparılıb, onları maraqlandıran suallar cavablandırılıb.

Maarifləndirici tədbirin keçirilməsində məqsəd iş yerlərində sağlam və təhlükəsiz əmək şəraitinin təmin olunmasına dəstək vermək, əməyin mühafizəsi sahəsində dövlət standartlarının tətbiqini təşviq etmək və işəgötürənlərlə müvafiq mütəxəssislərin bu istiqamətdə bilik və bacarıqlarının artırılmasına töhfə verməkdir.