Füzuli, Cəbrayıl və Zəngilanda işəgötürən və işçilər üçün növbəti maarifləndirici görüşlər keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti Füzuli, Cəbrayıl və Zəngilan rayonlarında Azərbaycan Respublikasının Minatəmizləmə Agentliyi (ANAMA) ilə birgə Azərbaycan Respublikası Prezidentinin Şərqi-Zəngəzur iqtisadi rayonundakı xüsusi nümayəndəliyinin dəstəyi ilə əməyin mühafizəsinə dair növbəti maarifləndirici görüşlər keçirib.

Görüşlərdə həmin ərazilərdə fəaliyyət göstərən 12 müəssisə üzrə 450 nəfərədək rəhbər və işçi heyəti iştirak edib. Onlara “İş yerlərində əməyin mühafizəsi” və "Mina təhlükəsizliyi" mövzularında ətraflı məlumat verilib. 

Tədbir müddətində qarşı tərəfi maraqlandıran müxtəlif suallar cavablandırılıb. Onlara əməyin mühafizəsinə dair yaddaş kitabçası və mina təhlükəsinə qarşı bukletlər təqdim edilib.

İşğaldan azad olunmuş digər ərazilərdə təlimlərin keçirilməsinin mütəmadi olması nəzərdə tutulur.