İmişlidə əmək qanunvericiliyi və əməyin mühafizəsi mövzularında maarifləndirmə tədbiri keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi tərəfindən İmişlidə “İş vaxtının növləri, iş vaxtının rejimi və iş vaxtından artıq vaxtda işin tənzimlənməsi qaydaları” və “İş yerlərində əməyin mühafizəsi”  mövzularına həsr olunmuş növbəti maarifləndirmə tədbiri keçirilib.

Tədbirdə Xidmətin Mil-Muğan regional şöbəsinin əhatə etdiyi rayonlar üzrə dövlət və özəl sektora aid 90 müəssisə və  təşkilatın nümayəndəsi, Nazirliyin digər tabeli qurumlarının, İmişli rayon üzrə ictimai birliklərin əməkdaşları olmaqla 150-dək şəxs iştirak edib.

Xidmətin Mil-Muğan regional şöbəsinin əməkdaşı  iş vaxtının növləri, iş vaxtının rejimi və iş vaxtından artıq vaxtda işin tənzimlənməsi qaydaları ilə bağlı əmək qanunvericiliyinin tələbləri, işəgötürənlərin bu tələblərlə bağlı daşıdıqları hüquqi vəzifə və məsuliyyətlər barədə çıxış edib 

Daha sonra Dövlət Əmək Müfəttişiyi Xidmətinin tabeliyində fəaliyyət göstərən Əməyin Mühafizəsi Mərkəzinin  əməkdaşı tədbir iştirakçılarinı iş yerlərində əməyin mühafizəsinin haqqında danışıb. Əməyin mühafizəsi sahəsində yeni qəbul edilmiş dövlət standartlarının tətbiqinin əhəmiyyəti, bu standartların iş yerlərində təhlükəsizlik səviyyəsinin yüksəldilməsinə töhfəsi, eləcə də sağlam və təhlükəsiz əmək şəraitinin formalaşdırılmasını təşviq edən “Vision Zero” konsepsiyasının əsas prinsipləri barədə məlumat verib.

Tədbir zamanı mövzular ətrafında fikir mübadiləsi aparılıb, iştirakçıları maraqlandıran suallar cavablandırılıb.