Lənkəranda qadınların qeyri-formal məşğulluğunun qarşısının alınması ilə bağlı maarifləndirmə tədbiri keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən Lənkəran şəhərində qadınların qeyri-formal məşğulluğunun qarşısının alınması mövzusunda maarifləndirmə tədbiri keçirilib.

Xidmətin Lənkəran-Astara regional şöbəsi tərəfindən təşkil olunan tədbirdə 40-a yaxın qadın işəgötürən və onların nümayəndəsi iştirak edib.

Maarifləndirmə tədbirində qadınların əmək bazarında rəsmi məşğulluğa cəlb olunmasının əhəmiyyəti, əmək münasibətlərinin əmək müqaviləsi əsasında rəsmiləşdirilməsi və qeyri-formal məşğulluğun yaratdığı hüquqi və sosial risklər barədə məlumat verilib.

Bildirilib ki, əmək müqaviləsi olmadan işə cəlb olunma işçilərin əmək, sosial təminat və gələcək pensiya hüquqlarının qorunmasına mənfi təsir göstərir. Bu baxımdan işçilərlə əmək münasibətlərinin qanunvericiliyin tələblərinə uyğun rəsmiləşdirilməsi xüsusi əhəmiyyət daşıyır.

Tədbir zamanı qadınların qeyri-formal məşğulluğunun qarşısının alınması istiqamətində işəgötürənlərin üzərinə düşən vəzifələr diqqətə çatdırılıb.

Sonda iştirakçıların mövzu ilə bağlı sualları cavablandırılıb.

 Qeyd edək ki, tədbir Azərbaycan Respublikasında gender (kişi və qadınların) bərabərliyi üzrə 2026 – 2028-ci illər üçün Milli Fəaliyyət Planına əsasən təşkil olunub.