Mingəçevirdə əmək hüquqları və əməyin mühafizəsi mövzusunda növbəti maarifləndirmə tədbirləri təşkil edilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən Mingəçevir şəhərində növbəti silsilə maarifləndirmə tədbirləri keçirilib.

Xidmətin Mərkəzi Aran regional şöbəsi və Əməyin Mühafizəsi Mərkəzi tərəfindən təşkil olunan tədbirlərə şəhərdə fəaliyyət göstərən 6 müəssisə üzrə ümumilikdə 229 nəfər işçi cəlb edilib. Görüşlər “Mingəçevir Regional Elektrik Şəbəkəsi” MMC, “Mingəçevir Su Elektrik Stansiyası” MMC, Mingəçevir Rayon Gigiyena və Epidemiologiya Mərkəzi, “AMAAX” MMC və “Azərbaycan İstilik Elektrik Stansiyası” MMC-də baş tutub.

Tədbirlər zamanı iştirakçılara Əmək Məcəlləsinə edilmiş son dəyişikliklər, əmək müqavilələrinin qanunvericiliyin tələblərinə uyğun bağlanılması, məzuniyyət hüququnun təmin edilməsi, habelə əmək müqaviləsinə xitam verilməsinin əsasları və qaydaları barədə məlumat verilib.

Bununla yanaşı, uşaqların əmək hüquqları, məcburi əmək və insan alverinin qarşısının alınması, iş yerlərində əməyin mühafizəsi, əməyin təhlükəsizliyi və gigiyenası, iş yerlərinin attestasiyası, Əməyin Mühafizəsi Mərkəzinin fəaliyyəti və əməyin mühafizəsi üzrə standartlar barədə də iştirakçılar maarifləndirilib.

Eyni zamanda 18 may – 18 iyun tarixlərini əhatə edən “İnsan Hüquqları Aylığı” çərçivəsində əmək hüquqları ilə bağlı maarifləndirmə işlərinin əhəmiyyəti qeyd olunub.

Sonda iştirakçıların mövzu ilə bağlı sualları cavablandırılıb.