Mingəçevirdə gender bərabərliyi və əmək münasibətləri mövzusunda təlim təşkil olunub

Mingəçevir şəhərində işəgötürənlər üçün “Əmək münasibətlərində gender bərabərliyi - bərabər hüquqlar, bərabər imkanlar” mövzusunda maarifləndirici tədbir keçirilib.

Tədbirdə Əmək və Əhalinin Sosial Müdafiəsi Nazirliyinin, Nazirlik yanında Dövlət Əmək Müfəttişliyi Xidmətinin, Nazirliyin tabeliyində fəaliyyət göstərən Dövlət Məşğulluq Agentliyinin, Xidmətin tabeliyində olan Əməyin Mühafizəsi Mərkəzinin nümayəndələri, ictimai birliklərin təmsilçiləri, eləcə də Mərkəzi Aran Regional Şöbəsinin əhatə etdiyi rayonlardan dövlət və özəl sektora aid müəssisə və təşkilatları təmsil edən 73 nəfər iştirak edib.

Görüşdə əmək qanunvericiliyinin tələblərinə əməl olunmasının vacibliyi, beynəlxalq təhlillərin nəticələri, əmək qanunvericiliyində son illərdə həyata keçirilən islahatlar, həmçinin Dövlət Əmək Müfəttişliyi Xidməti tərəfindən mütəmadi keçirilən maarifləndirici tədbirlərin əhəmiyyəti barədə ətraflı məlumat verilib.

Eyni zamanda, Əmək Məcəlləsi və əmək qanunvericiliyinə dair digər normativ-hüquqi aktlarda nəzərdə tutulan güzəştlər, imtiyazlar və əlavə təminatlar, eləcə də əməyin mühafizəsi sahəsində qəbul edilmiş yeni standartlar iştirakçılara izah olunub.

Tədbirdə, həmçinin, Dünya Bankı Qrupunun “Business Ready” reytinq hesabatı barədə məlumat təqdim edilib.

Sonda iştirakçıların mövzu ilə bağlı sualları cavablandırılıb.