Naxçıvanda azyaşlılar üçün təhlükəsiz davranış qaydalarına dair maarifləndirmə təlimi keçirilib

          Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin tabeliyində fəaliyyət göstərən Əməyin Mühafizəsi Mərkəzi tərəfindən Naxçıvan şəhər 3 nömrəli körpələr evi-uşaq bağçasında maarifləndirmə təlimi keçirilib.

        Təlim azyaşlılar üçün əməyin mühafizəsi və təhlükəsiz davranış qaydalarına həsr olunub. Təlimin məqsədi uşaqlarda əməyin mühafizəsi barədə ilkin təsəvvürlərin formalaşdırılması, gündəlik həyatda və bağça mühitində təhlükəsiz davranış vərdişlərinin aşılanması, eləcə də təhlükəli vəziyyətləri tanımaq və belə hallarda düzgün davranmaq bacarıqlarının inkişaf etdirilməsi olub.

           Uşaqların yaş xüsusiyyətləri nəzərə alınaraq təhlükəsizlik qaydaları onlara sadə və əyləncəli formada izah edilib. Böyüklərin xəbərdarlıqlarına əməl etməyin və təhlükəli vəziyyətlərdən uzaq durmağın vacibliyi diqqətə çatdırılıb.

        Təlimin interaktivliyini təmin etmək məqsədilə uşaqlara təhlükəsiz davranış qaydalarını əks etdirən xüsusi boyama jurnalları paylanılıb. Uşaqlar həmin materialları rəngləməklə öyrəndikləri qaydaları praktik şəkildə möhkəmləndiriblər.

           Qeyd edək ki, Əməyin Mühafizəsi Mərkəzi tərəfindən azyaşlılar arasında təhlükəsiz davranış vərdişlərinin formalaşdırılması istiqamətində maarifləndirmə tədbirlərinin davam etdirilməsi nəzərdə tutulur.