Naxçıvanda ƏMAS-ın imkanları və qeyri-formal məşğulluğun qarşısının alınması mövzuları müzakirə olunub

Naxçıvanda “ƏMAS-ın imkanları və yeniliklər” və “Qeyri-formal məşğulluğun qarşısının alınması” mövzularında maarifləndirici tədbir keçirilib.

Naxçıvan Muxtar Respublikasının Əmək və Əhalinin Sosial Müdafiəsi Nazirliyi və Nazirliyin yanında Dövlət Əmək Müfəttişliyi Xidmətinin təşkilatçılığı ilə keçirilən tədbirdə dövlət və özəl sektoru təmsil edən 42 qurumdan ümumilikdə 46 nümayəndə iştirak edib.

Tədbirdə Nazirlik yanında Dövlət Əmək Müfəttişliyi Xidmətinin və Nazirliyin tabeliyində Dövlət Məşğulluq Agentliyinin əməkdaşları tərəfindən “Əmək və Məşğulluq” altsisteminin (ƏMAS) imkanları, funksional bölmələri və sistemdə tətbiq olunan son yeniliklər barədə iştirakçılara ətraflı məlumat verilib.

Həmçinin vakant və yeni yaradılmış iş yerləri barədə məlumatların vakansiya bankına daxil edilməsi zamanı nəzərə alınmalı məsələlər diqqətə çatdırılıb, vakansiya bankının işəgötürənlər üçün yaratdığı imkan və üstünlüklər barədə məlumat verilib.

Eyni zamanda, qeyri-formal məşğulluğun yaratdığı risklər və bu sahədə mövcud problemlər müzakirə olunub, qeyri-formal məşğulluğun qarşısının alınması istiqamətində görülən işlər iştirakçıların diqqətinə çatdırılıb.

Sonda müzakirə olunan mövzularla bağlı iştirakçıları maraqlandıran suallar cavablandırılıb.