Naxçıvanda əmək hüquqları və əməyin mühafizəsi mövzularında maarifləndirmə tədbiri keçirilib

Naxçıvan Muxtar Respublikasının Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən işəgötürənlər və onların nümayəndələri üçün “Analığın mühafizəsi, qadınların əmək hüquqları və gender bərabərliyi”, “İş yerlərində əməyin mühafizəsi” və “Qeyri-formal məşğulluğun qarşısının alınması” mövzularında maarifləndirmə tədbiri keçirilib.

Tədbirdə Dövlət Əmək Müfəttişliyi Xidmətinin, Əməyin Mühafizəsi Mərkəzinin Naxçıvan filialının və Dövlət Məşğulluq Agentliyinin əməkdaşları, həmçinin 25 dövlət və qeyri-dövlət müəssisəsini təmsil edən 30-a yaxın şəxs iştirak edib.

İştirakçılara qadınların əmək hüquqlarının qorunmasının əhəmiyyəti, onların əməyindən qanunvericiliyin tələblərinə uyğun istifadə olunmasının vacibliyi barədə məlumat verilib.

Çıxışlar zamanı Əmək Məcəlləsində və digər normativ hüquqi aktlarda qadınlar üçün nəzərdə tutulan güzəştlər, imtiyazlar və əlavə təminatlar, əməyin mühafizəsi normaları, qaydaları və prinsipləri, eləcə də iş yerlərinin attestasiyasının keçirilməsi qaydaları diqqətə çatdırılıb.

Həmçinin qeyri-formal məşğulluğun qarşısının alınması istiqamətində həyata keçirilən tədbirlər və əmək münasibətlərinin rəsmiləşdirilməsinin işçi və işəgötürənlər üçün yaratdığı hüquqi təminatlar barədə ətraflı məlumat təqdim olunub.

Sonda mövzular ətrafında fikir mübadiləsi aparılıb və iştirakçıları maraqlandıran suallar cavablandırılıb.