Naxçıvanda istehsalatda bədbəxt hadisələrin qarşısının alınmasına dair onlayn təlim keçirilib

Dövlət Əmək Müfəttişliyi Xidmətinin tabeliyində fəaliyyət göstərən Əməyin Mühafizəsi Mərkəzinin Naxçıvan filialının təşkilatçılığı ilə növbəti maarifləndirici təlim onlayn formatda keçirilib.

Təlimdə 12 müəssisənin 23 nümayəndəsi cəlb olunub.

Təlim əməyin mühafizəsi, texniki təhlükəsizlik, yanğın və elektrik təhlükəsizliyi, istehsalatda bədbəxt hadisələrin qarşısının alınması, işçilərin istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortası, eləcə də ilk yardımın göstərilməsi mövzularını əhatə edib.

Təlim zamanı iştirakçılara iş yerlərində təhlükəsiz əmək şəraitinin yaradılması, mövcud risklərin müəyyən edilməsi və onların qarşısının alınması, texniki və elektrik avadanlıqlarından təhlükəsiz istifadə, yanğın təhlükəsizliyi qaydalarına əməl olunması barədə məlumat verilib.

Eyni zamanda, istehsalatda bədbəxt hadisələrin başvermə səbəbləri və onların qarşısının alınması yolları, işçilərin icbari sığortasının əhəmiyyəti, bədbəxt hadisələr zamanı ilkin yardımın göstərilməsi ilə bağlı iştirakçılara müvafiq məlumat və tövsiyələr təqdim olunub.

Bildirilib ki, əməyin mühafizəsi norma və qaydalarına riayət edilməsi, iş yerlərində təhlükəsizlik tədbirlərinin gücləndirilməsi istehsalatda bədbəxt hadisələrin və peşə risklərinin azalmasında mühüm rol oynayır.

Təlimin sonunda iştirakçıların mövzu ilə bağlı sualları cavablandırılıb.