Naxçıvanda istehsalatda bədbəxt hadisələrin qarşısının alınmasına dair təlimlər davam etdirilir

Dövlət Əmək Müfəttişliyi Xidmətinin tabeliyində fəaliyyət göstərən Əməyin Mühafizəsi Mərkəzinin Naxçıvan filialının təşkilatçılığı ilə növbəti təlim Şahbuz Rayon Kommunal Müəssisələri Kombinatında keçirilib.

14 nəfərin iştirak etdiyi təlim “Əməyin mühafizəsi haqqında ümumi anlayışlar, elektrik və yanğın təhlükəsizliyi, bədbəxt hadisələr zamanı ilk yardımın göstərilməsi” mövzusuna həsr olunub.

Təlim zamanı iştirakçılara əməyin mühafizəsinin əsas prinsipləri, iş yerlərində yarana biləcək risklərin müəyyən edilməsi və həmin risklərin qarşısının alınması yolları barədə məlumat verilib.

Eyni zamanda, elektrik avadanlıqlarından təhlükəsiz istifadə, yanğın zamanı düzgün davranış qaydaları, bədbəxt hadisələr zamanı ilkin yardımın göstərilməsi, fərdi mühafizə vasitələrindən düzgün istifadə və təhlükəsiz əmək şəraitinin yaradılması ilə bağlı praktiki tövsiyələr təqdim olunub.

Bildirilib ki, əməyin mühafizəsi norma və qaydalarına əməl olunması istehsalatda baş verə biləcək bədbəxt hadisələrin və peşə risklərinin azalmasında mühüm rol oynayır.

Təlimin sonunda iştirakçıların mövzu ilə bağlı sualları cavablandırılıb.