Naxçıvanda məktəbəqədər təhsil müəssisəsinin əməkdaşları üçün yanğın təhlükəsizliyi və ilkin yardım üzrə təlim keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin tabeliyindəki Əməyin Mühafizəsi Mərkəzi tərəfindən Naxçıvan şəhər 3 saylı uşaq bağçası-körpələr evinin müəllim kollektivi üçün təlim təşkil olunub.

Yanğın təhlükəsizliyi və ilkin yardım mövzularını əhatə edən təlimin məqsədi əməkdaşların müvafiq bilik və bacarıqlarını artırmaq, fövqəladə hallar zamanı düzgün və operativ davranış qaydalarını mənimsətmək olub.

Təlim zamanı iştirakçılara yanğınların yaranma səbəbləri, onların qarşısının alınması yolları, yanğın zamanı təxliyə qaydaları və ilkin yanğınsöndürmə vasitələrindən istifadə barədə məlumat verilib. Həmçinin müxtəlif xəsarətlər və sağlamlıq üçün təhlükə yaradan hallarda ilkin yardımın göstərilməsi qaydaları izah edilib.

Azyaşlıların təhlükəsizliyinin təmin edilməsində pedaqoji heyətin bilik və hazırlığının mühüm rol oynadığı vurğulanıb.

Təlimdə ümumilikdə 20 nəfər iştirak edib.

Qeyd edək ki, Əməyin Mühafizəsi Mərkəzi tərəfindən təhsil müəssisələrində təhlükəsiz iş və təlim mühitinin formalaşdırılması məqsədilə maarifləndirmə tədbirlərinin davam etdirilməsi nəzərdə tutulur.