Naxçıvanda məktəblilər əməyin mühafizəsinə dair maarifləndirilib

Naxçıvan şəhər Ə. Sultanlı adına 10 nömrəli tam orta məktəbdə növbəti maarifləndirmə təlimi təşkil olunub.

Təlim “Əməyin mühafizəsi haqqında ümumi anlayışlar, elektrik və yanğın təhlükəsizliyi, bədbəxt hadisələr zamanı ilkin yardımın göstərilməsi” mövzusuna həsr edilib.

Əməyin Mühafizəsi Mərkəzinin Naxçıvan filialı və “Naxçıvan Təlim Mərkəzi” publik hüquqi şəxsinin birgə təşkilatçılığı ilə keçirilən təlimdə ümumilikdə 40 şagird iştirak edib.

Təlim zamanı iştirakçılara əməyin mühafizəsi üzrə ümumi anlayışlar, elektrik və yanğın təhlükəsizliyi qaydaları, bədbəxt hadisələr zamanı ilkin yardımın göstərilməsi barədə ətraflı məlumat verilib, mövzu ilə bağlı vacib məqamlar diqqətə çatdırılıb.

Sonda iştirakçıların sualları cavablandırılıb və mövzu ətrafında fikir mübadiləsi aparılıb.