Naxçıvanda məktəblilər üçün əməyin mühafizəsi üzrə maarifləndirmə tədbiri keçirilib

Naxçıvanda ümumi təhsil müəssisələrində əməyin mühafizəsi üzrə maarifləndirmə tədbirləri davam etdirilir.

Növbəti tədbir Naxçıvan şəhər 17 nömrəli tam orta məktəbdə təşkil olunub. “Əməyin mühafizəsi haqqında ümumi anlayışlar, elektrik və yanğın təhlükəsizliyi, bədbəxt hadisələr zamanı ilkin yardımın göstərilməsi” mövzusunda keçirilən təlimdə 70-ə yaxın şagird və məktəbin pedaqoji kollektivi iştirak edib.

Əməyin Mühafizəsi Mərkəzinin Naxçıvan filialı və “Naxçıvan Təlim Mərkəzi” publik hüquqi şəxsinin birgə təşkilatçılığı ilə keçirilən təlimdə iştirakçılara əməyin mühafizəsi üzrə ilkin anlayışlar, elektrik və yanğın təhlükəsizliyi qaydaları, habelə bədbəxt hadisələr zamanı ilkin yardımın göstərilməsi barədə məlumat verilib.

Tədbirin sonunda iştirakçıların mövzu ilə bağlı sualları cavablandırılıb.