“Qadınların əməyinin mühafizəsi” mövzusunda dəyirmi masa keçirilib

Ümumdünya Əməyin Mühafizəsi Gününə həsr olunmuş “Qadınların əməyinin mühafizəsi” mövzusunda hibrid formatda dəyirmi masa keçirilib.

Görüşdə Azərbaycan Respublikasının Əmək və Əhalinin Sosial Müdafiəsi Nazirliyi, Nazirlik yanında Dövlət Əmək Müfəttişliyi Xidməti, Xidmətin tabeliyində Əməyin Mühafizəsi Mərkəzi, eləcə də Belarus, Qazaxıstan, Qırğızıstan, Rusiya, Tacikistan, Türkmənistan və Özbəkistan da daxil olmaqla Müstəqil Dövlətlər Birliyi (MDB) ölkələrinin aidiyyəti dövlət qurumlarının rəhbər şəxsləri, həmçinin beynəlxalq və regional təşkilatların nümayəndələri iştirak ediblər.

MDB-nin İcraiyyə Komitəsi tərəfindən Belarus Respublikasının Əmək və Əhalinin Sosial Müdafiəsi Nazirliyinin təşəbbüsü ilə keçirilən görüşün məqsədi MDB-yə üzv ölkələr arasında təcrübə mübadiləsinin aparılması, eləcə də ölkələrdə həyata keçirilən son islahatların müzakirə edilməsi olub.

Görüşdə gender bərabərliyi və əməyin mühafizəsi ilə bağlı Azərbaycanda həyata keçirilən son islahatlara dair təqdimatla çıxış edilib. Ölkəmizin bu sahədə təcrübəsi iştirakçılar tərəfindən müsbət qarşılanıb.