Şəkidə əməkhaqqı və əməyin mühafizəsi mövzularında maarifləndirmə tədbiri keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən Şəkidə “Əməkhaqqının ödənilməsi formaları, qaydaları və əməkhaqqından tutulmalar” və “İş yerlərində əməyin mühafizəsi” mövzularında növbəti maarifləndirmə tədbiri keçirilib.

Xidmətin Şəki-Zaqatala regional şöbəsinin təşkilatçılığı ilə keçirilən tədbir 21 avqust - 21 sentyabr 2026-cı il tarixlərini əhatə edən “Sülh aylığı” çərçivəsində təşkil olunub.

Tədbirdə regional şöbənin əhatə etdiyi rayonlarda fəaliyyət göstərən dövlət və özəl sektora aid müəssisə və təşkilatı təmsil edən 60-a yaxın şəxs iştirak edib.

Tədbirin açılışında “Sülh aylığı” barədə məlumat verilib. Bildirilib ki, əmək münasibətlərində qarşılıqlı hörmətin, sosial dialoqun və təhlükəsiz əmək mühitinin təşviqi sülh, həmrəylik və əməkdaşlıq dəyərlərinin möhkəmləndirilməsinə xidmət edir.

Daha sonra iştirakçılara əməkhaqqının ödənilməsi müddətləri, işəgötürənin təqsiri üzündən əməkhaqqının gecikdirildiyi hallarda qanunvericiliyin tələbləri və digər məsələlər barədə məlumat verilib.

Tədbirdə, həmçinin iş yerlərində əməyin mühafizəsinin təşkili məsələlərinə toxunulub. Əməyin mühafizəsi sahəsində dövlət standartlarının tətbiqinin iş yerlərində təhlükəsizlik səviyyəsinin yüksəldilməsində rolu, sağlam və təhlükəsiz əmək şəraitinin yaradılmasının əhəmiyyəti, eləcə də “Vision Zero” konsepsiyasının əsas prinsipləri diqqətə çatdırılıb.

Sonda mövzular ətrafında fikir mübadiləsi aparılıb və iştirakçıların sualları cavablandırılıb.