Şəkidə əməyin mühafizəsi və icbari sığorta mövzusunda maarifləndirici təlim keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin tabeliyindəki Əməyin Mühafizəsi Mərkəzi və İcbari Sığorta Bürosunun birgə əməkdaşlığı çərçivəsində əməyin mühafizəsi və təhlükəsiz əmək şəraitinin təmininə dair növbəti maarifləndirici təlim Şəkidə təşkil olunub.

Təlimdə “İstehsalatda baş vermiş bədbəxt hadisələr və icbari sığorta”, “Əməyin mühafizəsi və texniki təhlükəsizlik”, eləcə də “Risklərin azaldılması məqsədilə süni intellekt əsaslı idarəetmə sistemləri və fərdi mühafizə vasitələrinin tətbiqi” mövzularına dair təqdimatlar edilib.

Görüşdə Şəki Su Meliorasiya Sistemlərinin İstismarı İdarəsinin 30 əməkdaşı iştirak edib. Əməyin Mühafizəsi Mərkəzinin, İcbari Sığorta Bürosunun və Standartlaşdırma İnstitutunun nümayəndələri çıxış edərək əməyin mühafizəsi üzrə dövlət standartları, istehsalatda bədbəxt hadisələr və peşə xəstəlikləri nəticəsində əmək qabiliyyətinin itirilməsi hallarına dair icbari sığorta mexanizmləri barədə məlumat veriblər.

Təlim interaktiv müzakirələrlə davam edib, iştirakçıların mövzu ilə bağlı sualları cavablandırılıb.

Qeyd edək ki, təlimlərin əsas məqsədi işəgötürənlər və işçilər arasında əməyin mühafizəsi sahəsində mövcud qanunvericiliyin tələbləri, layiqli əməyin təmin olunması, təhlükəsiz və sağlam əmək şəraitinin yaradılması istiqamətində maarifləndirməni gücləndirmək, istehsalatda bədbəxt hadisələrin və peşə xəstəliklərinin qarşısının alınması üçün qabaqlayıcı tədbirlərin vacibliyini vurğulamaqdır.