SOCAR-ın “Kompleks Qazma İşləri Tresti”ndə əməyin mühafizəsi üzrə təlim keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən Azərbaycan Respublikası Dövlət Neft Şirkətinin (SOCAR) “Kompleks Qazma İşləri Tresti”ndə əməyin mühafizəsinə dair təlim təşkil olunub.

Təlimdə müəssisənin 26 əməkdaşı iştirak edib. Tədbir zamanı iştirakçılara əməyin mühafizəsi sahəsində qanunvericiliyin tələbləri, iş yerlərində təhlükəsiz və sağlam əmək şəraitinin yaradılması, istehsalat risklərinin idarə olunması, təhlükəli və zərərli istehsalat amillərinin təsirinin azaldılması, fərdi mühafizə vasitələrindən düzgün istifadə qaydaları və bədbəxt hadisələrin qarşısının alınması istiqamətində ətraflı məlumat verilib.

Həmçinin əməyin mühafizəsi sahəsində tətbiq olunan standartlar, əmək təhlükəsizliyi mədəniyyətinin formalaşdırılması və qabaqlayıcı tədbirlərin əhəmiyyəti iştirakçıların diqqətinə çatdırılıb. Sonda iştirakçıları maraqlandıran suallar cavablandırılıb və mövzu ətrafında fikir mübadiləsi aparılıb.

Qeyd edək ki, Dövlət Əmək Müfəttişliyi Xidməti tərəfindən keçirilən maarifləndirici tədbirlər iş yerlərində əməyin mühafizəsi sahəsində məlumatlılığın artırılmasına və istehsalatda baş verə biləcək bədbəxt hadisələrin qarşısının alınmasına xidmət edir.