Tacikistanın əmək, miqrasiya və əhalinin məşğulluğu nazirinin başçılıq etdiyi nümayəndə heyəti ilə görüş keçirilib

Tacikistanın Əmək, miqrasiya və əhalinin məşğulluğu naziri Gülnora Hasanzodanın başçılıq etdiyi nümayəndə heyəti ilə görüş olub.

Dövlət Əmək Müfəttişliyi Xidmətinin rəisi Vəli Quliyev ölkəmizdə son illər aparılan sosial islahatlar, innovativ həllərin tətbiqi və əldə olunan uğurlardan danışıb. Xidmət rəisi “Əmək və Məşğulluq” altsisteminin (ƏMAS) əhəmiyyətini qeyd edib. Qonaqlara Xidmətin fəaliyyət sahələri və ƏMAS-la bağlı təqdimatlar olub.Əmək qanunvericiliyinin təkmilləşdirilməsi istiqamətində atılan addımlar barədə məlumat verilib.

Azərbaycan Respublikasında işəgötürənlər tərəfindən əmək qanunvericiliyinə əməl olunmasına dövlət nəzarətinin təmin edilməsinə nail olmaq üçün qanunvericiliyin tələblərinin pozulması faktının aşkar edilməsi və müvafiq tədbirlərin görülməsi məqsədilə hazırlanan “E-audit” sistemi təqdim edilib. Bildirilib ki, “E-audit” sisteminin tətbiqinin əsas məqsədi yoxlamalarda şəffaflığın və operativliyin artırılması, insan faktorunun və müfəttiş-işəgötürən təmasının azaldılması, resurslardan səmərəli istifadə və digər bu kimi məsələlərdir.

Nümayəndə heyəti üçün həmçinin Əmək və Əhalinin Sosial Müdafiəsi Nazirliyinin tabeliyindəki DOST İnklüziv İnkişaf və Yaradıcılıq Mərkəzi və DOST Agentliyinə infoturlar təşkil edilib.

Qonaqlara inklüziv yaradıcılıq məkanında görülən işlər, həyata keçirilən layihələr və DOST konsepsiyası barədə ətraflı məlumat əldə ediblər.

Qeyd edək ki, nümayəndə heyəti İslam Əməkdaşlıq Təşkilatına (İƏT) üzv dövlətlərin əmək nazirlərinin Bakıda keçirilən 5-ci konfransında iştirak etmək üçün ölkəmizdə səfərdə olublar.