Təhlükəsiz və sağlam iş mühitinin yaradılması məqsədilə növbəti təlim keçirilib

Təhlükəsiz və sağlam iş mühitinin yaradılması məqsədilə növbəti təlim təşkil edilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən əməyin mühafizəsi və təhlükəsiz əmək şəraitinin təmin olunmasına dair növbəti maarifləndirici təlim “Baku Steel Company” QSC-nin əməkdaşları üçün keçirilib.

Təlimdə müəssisənin 30-a yaxın əməkdaşı iştirak edib.

Xidmətin və onun tabeliyindəki Əməyin Mühafizəsi Mərkəzinin mütəxəssisləri tərəfindən keçirilən sessiya zamanı əməyin mühafizəsi sahəsində qəbul edilmiş dövlət standartları, onların tətbiqi, həmçinin müəssisələrdə təhlükəsizlik mədəniyyətinin formalaşdırılması istiqamətində vacib mexanizmlər izah edilib. Bununla yanaşı, istehsalat qəzalarının qarşısının alınması, profilaktik tədbirlərin gücləndirilməsi, işçilərin bilik və bacarıqlarının artırılması kimi mövzular da diqqət mərkəzində olub.

Qeyd edək ki, təlimin əsas məqsədi işəgötürənlərə və işçilərə əməyin mühafizəsi sahəsində mövcud qanunvericiliyin tələbləri haqqında məlumat vermək, layiqli əmək şəraitinin təmin olunmasına dəstək göstərmək, eləcə də istehsalatda bədbəxt hadisələrin və peşə xəstəliklərinin qarşısının alınması ilə bağlı əməyin mühafizəsi üzrə mütəxəssislərin bilik və bacarıqlarının artırılmasıdır.