“142” Çağrı Mərkəzinin əməkdaşları üçün təlim təşkil olunub

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən “142” Çağrı mərkəzinin əməkdaşları üçün təlim təşkil olunub.

Təlim işəgötürənlər tərəfindən “142” Çağrı mərkəzinə daxil olan müraciətlərin daha operativ və düzgün cavablandırılması, habelə əmək qanunvericiliyinin tələbləri ilə bağlı məlumatlılığın artırılması məqsədi daşıyıb.

Təlim zamanı iştirakçılara Əmək Məcəlləsinə edilmiş son dəyişikliklər, əmək münasibətlərində tətbiq olunan yeni yanaşmalar, işçi və işəgötürən hüquq və vəzifələri, habelə müraciətlərin mövzular üzrə düzgün yönləndirilməsi barədə ətraflı məlumat verilib.

Eyni zamanda, işəgötürənlər tərəfindən daha çox ünvanlanan suallar, əmək müqavilələrinin bağlanılması və xitamı, iş vaxtı, məzuniyyətlər, əməkhaqqı, son haqq-hesab və digər aktual məsələlər üzrə izahat verilib.

Təlimin sonunda iştirakçıları maraqlandıran suallar cavablandırılıb, daxil olan müraciətlərin cavablandırılması zamanı vahid yanaşmanın tətbiqi və qarşılıqlı əməkdaşlığın gücləndirilməsi ilə bağlı fikir mübadiləsi aparılıb.