Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin Dağlıq Şirvan regional şöbəsi tərəfindən “Uşaq Hüquqları Aylığı” çərçivəsində İsmayıllı şəhər E.Məmmədov adına 3 saylı tam orta məktəbdə maarifləndirmə tədbiri keçirilib.
“Uşaqların əmək hüquqları” mövzusunda təşkil olunan tədbirdə məktəbin 100-ə yaxın yuxarı sinif şagirdi, Xidmətin Dağlıq Şirvan regional şöbəsinin, İsmayıllı Rayon Polis Şöbəsinin İctimai Təhlükəsizlik Bölməsinin əməkdaşları və məktəb rəhbərliyi iştirak ediblər.
Şagirdlərə uşaqların əmək hüquqları, əmək qanunvericiliyində yetkinlik yaşına çatmayan şəxslərin əməyinin tənzimlənməsi ilə bağlı müəyyən edilmiş tələblər, eləcə də uşaq əməyinin istismarının qarşısının alınması istiqamətində görülən işlər barədə məlumat verilib.
Görüşdə, həmçinin uşaq əməyinin istismarına qarşı mübarizənin, məcburi əmək və insan alveri hallarının qarşısının alınmasında aidiyyəti qurumlar arasında əməkdaşlığın və maarifləndirmə tədbirlərinin əhəmiyyəti vurğulanıb.
Sonda şagirdləri maraqlandıran suallar cavablandırılıb, mövzu ətrafında fikir mübadiləsi aparılıb.