DƏMX tərəfindən ƏMAS-ın imkanları və yeniliklərinə dair təlim keçirilib

              Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən işəgötürənlər üçün “Əmək və Məşğulluq” altsisteminin (ƏMAS) imkanları və yeniliklərinə dair təlim keçirilib. 

            Nazirliyin tabeliyində Əmək Bazarı və Sosial Müdafiə Məsələləri üzrə Milli Observatoriyada keçirilən təlimdə ƏMAS-ın əmək münasibətlərinin elektron qaydada rəsmiləşdirilməsi və rəqəmsal mühitdə idarə olunmasında, əmək hüquqlarının qorunmasında və əmək qanunvericiliyinə əməl olunmasına nəzarətin həyata keçirilməsində rolu barədə məlumat verilib. Təlimdə 30-a dək şəxs iştirak edib.

          Bildirilib ki, altsistem əmək müqavilələrinin bağlanılması və onlara dəyişikliklərin edilməsi, əməkhaqqı, məzuniyyət, ezamiyyət və digər əmək münasibətləri ilə bağlı məlumatların elektron qaydada idarə olunmasına imkan yaradır.

          Həmçinin ƏMAS-da tətbiq edilən yeniliklər, işçi və işəgötürənlər üçün rəqəmsal xidmətlərin əlçatanlığının artırılması, əmək qanunvericiliyinin pozulması riskləri ilə bağlı qabaqlayıcı bildiriş mexanizmləri və altsistemin təkmilləşdirilməsi istiqamətində görülən işlər barədə iştirakçılara məlumat verilib.

                Təlimin sonunda iştirakçıları maraqlandıran suallar cavablandırılıb.