Əməyin təhlükəsizliyi sahəsi üzrə növbəti 20 yeni dövlət standartı təsdiq edilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin sədrliyi ilə fəaliyyət göstərən “Əmək sahəsində” standartlaşdırma üzrə Texniki Komitənin (AZSTAND/TK 21) 2026-cı il üzrə Fəaliyyət Planına əsasən hazırlanmış və əməyin təhlükəsizliyi sahəsini əhatə edən növbəti 20 yeni standart Azərbaycan Standartlaşdırma İnstitutunun müvafiq qərarı ilə dövlət standartı kimi qəbul edilib.

Yeni standartlar iş yerlərində əməyin mühafizəsinin gücləndirilməsi, peşə risklərinin azaldılması, işçilərin sağlamlığının və təhlükəsizliyinin təmin edilməsi, habelə fərdi mühafizə vasitələrinə dair müasir tələblərin tətbiqinin genişləndirilməsi baxımından mühüm əhəmiyyət daşıyır.

Təsdiq edilən standartlar gözün lazer şüalanmasından və eşitmə orqanlarının səs-küydən qorunması, hündürlükdən yıxılmaya qarşı fərdi mühafizə vasitələri, başın mühafizəsi, kimyəvi və radioaktiv maddələrdən qoruyucu geyimlər, elektrostatik təsirlərdən mühafizə, tənəffüs orqanlarının qorunması, eləcə də xüsusi qoruyucu ayaqqabılar və onların komponentləri üzrə tələbləri əhatə edir.

Standartlarla, həmçinin təhlükəsizlik ipləri, tam bədən üçün təhlükəsizlik kəmərləri, birləşdiricilər, oturaq vəziyyət üçün sığortalayıcı kəmərlər, xilasetmə və qaldırma qurğuları, xilasedici ilgəklər və az uzanan kanatlar kimi hündürlükdə iş və xilasetmə zamanı istifadə edilən fərdi mühafizə vasitələrinə dair tələblər və sınaq üsulları müəyyən olunur.

Yeni standartların iş yerlərində tətbiqi fərdi mühafizə vasitələrinin keyfiyyət və təhlükəsizlik göstəricilərinin yüksəldilməsinə, istehsalat risklərinin minimuma endirilməsinə və təhlükəsiz əmək şəraitinin yaradılmasına xidmət edir.

Qeyd edək ki, cari il ərzində ümumilikdə 60 dövlət standartının hazırlanması nəzərdə tutulub. Növbəti 20 standartın təsdiqlənməsi ilə 2026-cı il üzrə Fəaliyyət Planı çərçivəsində təsdiq edilən standartların sayı 25-ə çatıb.

Təsdiq edilən standartlar “Milli standartlaşdırma sisteminin beynəlxalq tələblərə uyğunlaşdırılmasına dair Dövlət Proqramı”na dair Tədbirlər Planının icrası çərçivəsində istinad standartları kimi hazırlanıb.

Dövlət Əmək Müfəttişliyi Xidməti ilə yanaşı, Fövqəladə Hallar Nazirliyi, Azərbaycan Respublikası Dövlət Neft Şirkəti (SOCAR), Kiçik və Orta Biznesin İnkişafı Agentliyi (KOBİA), Azərbaycan Respublikası Sahibkarlar (İşəgötürənlər) Təşkilatları Milli Konfederasiyası və Azərbaycan Həmkarlar İttifaqları Konfederasiyasının təmsil olunduğu Texniki Komitə tərəfindən əmək sahəsində dövlət standartlarının hazırlanması istiqamətində işlər davam etdirilir.