İsmayıllıda “Sülh aylığı” çərçivəsində maarifləndirmə tədbiri keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti “Sülh aylığı” çərçivəsində İsmayıllı rayonunda "İş vaxtının növləri, işvaxtının rejimi və iş vaxtından artıq vaxtda işin tənzimlənməsi qaydaları ", "İş  yerlərində əməyin mühafizəsi" mövzularında maarifləndirmə tədbiri təşkil edib.

Tədbirdə Azərbaycan Respublikasının İnsan Hüquqları üzrə Müvəkkili (Ombudsman) tərəfindən 21 avqust - 21 sentyabr tarixlərinin “Sülh Aylığı” elan edildiyi bildirilib. Qeyd edilib ki, aylığın keçirilməsində məqsəd sülhün və insan hüquqlarının qarşılıqlı əlaqəsi barədə ictimai məlumatlılığın artırılması, cəmiyyətdə qarşılıqlı hörmət və etimad mühitinin gücləndirilməsi, dialoq və anlaşma imkanlarının genişləndirilməsi, habelə dövlət qurumlarının, yerli özünüidarəetmə orqanlarının, vətəndaş cəmiyyəti institutlarının və geniş ictimaiyyətin bu istiqamətdə həyata keçirilən fəaliyyətlərdə iştirakının təşviq edilməsidir. 

Əmək münasibətlərində qarşılıqlı hörmətin, sosial dialoqun, bərabərliyin və təhlükəsiz əmək mühitinin təşviqinin də sülh, həmrəylik və əməkdaşlıq dəyərlərinin möhkəmləndirilməsinə xidmət etdiyi vurğulanıb.

Tədbirdə Dağlıq Şirvan iqtisadi rayonunda fəaliyyət göstərən dövlət və özəl sektora aid müəssisə və təşkilatların ümumilikdə 70 nəfər nümayəndəsi iştirak edib.

Çıxışlar zamanı iş vaxtının növləri, iş vaxtının rejimi, iş vaxtının uçotunun aparılması, iş vaxtından artıq işlərin görülməsi və bu işlərin qanunvericiliyin tələblərinə uyğun tənzimlənməsi qaydaları barədə iştirakçılara ətraflı məlumat verilib. İşəgötürənlərin iş vaxtının düzgün müəyyənləşdirilməsi və uçotunun aparılması, işçilərin istirahət hüquqlarının təmin edilməsi və iş vaxtından artıq işə cəlb olunma zamanı qanunvericiliyin tələblərinə riayət etməsinin vacibliyi vurğulanıb.

Həmçinin iş yerlərində əməyin mühafizəsinin təşkili, təhlükəsiz və sağlam əmək şəraitinin yaradılması, istehsalat risklərinin müəyyən edilməsi və qiymətləndirilməsi, bədbəxt hadisələrin və peşə xəstəliklərinin qarşısının alınması məsələlərinə toxunulub. İşəgötürənlərin əməyin mühafizəsi sahəsində öhdəlikləri, işçilərin təhlükəsizlik qaydalarına əməl etməsinin əhəmiyyəti və fərdi mühafizə vasitələrindən düzgün istifadə barədə praktiki tövsiyələr verilib.

Qeyd edilən mövzular ətrafında fikir mübadiləsi aparıldıqdan sonra iştirakçıları maraqlandıran suallar cavablandırılıb.