Naxçıvanda SƏTƏM mütəxəssisləri üçün təşkil olunan təlim proqramı başa çatıb

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin tabeliyində Əməyin Mühafizəsi Mərkəzinin Naxçıvan filialı və Naxçıvan Muxtar Respublikası Dövlət Əmək Müfəttişliyi Xidmətinin birgə təşkilatçılığı ilə SƏTƏM mütəxəssisləri üçün keçirilən təlim proqramı başa çatıb.

“Əməyin mühafizəsi və texniki təhlükəsizlik qaydaları” mövzusunda keçirilən təlimdə 17 müəssisəni təmsil edən 20 mütəxəssis iştirak edib.

Yekun sessiyada əməyin mühafizəsi sahəsində mütəxəssislərin hüquqi məsuliyyəti, Əmək Məcəlləsindən irəli gələn vəzifə və səlahiyyətlər barədə məlumat verilib. Bildirilib ki, bu istiqamətdə keçirilən təlimlər mütəxəssislərin peşəkar bilik və bacarıqlarının artırılmasına, müəssisələrdə əməyin mühafizəsi sisteminin müasir tələblərə uyğun qurulmasına və təhlükəsiz əmək mühitinin formalaşdırılmasına xidmət edir.

Daha sonra filialın baş mütəxəssisi əməyin mühafizəsi işinin təşkili, işçilərin təlimatlandırılması, yanğın təhlükəsizliyi və ilkin yardım qaydaları barədə təqdimatla çıxış edib.

Mövzular ətrafında aparılan müzakirələr zamanı iştirakçıların sualları cavablandırılıb, praktik fəaliyyətdə qarşıya çıxan məsələlərə aydınlıq gətirilib.

İki mərhələdən ibarət təlim proqramının yekununda iştirakçıların bilik və bacarıqlarının qiymətləndirilməsi məqsədilə test də keçirilib.