Naxçıvanda uşaqların əmək hüquqları mövzusunda maarifləndirici tədbir keçirilib

Naxçıvan Muxtar Respublikasının Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin təşkilatçılığı ilə Naxçıvan şəhər 12 nömrəli tam orta məktəbdə “Uşaqların əmək hüquqları” mövzusunda maarifləndirici tədbir keçirilib.

Tədbir “Uşaq Hüquqları Aylığı” çərçivəsində təşkil olunub. Görüşdə Dövlət Əmək Müfəttişliyi Xidmətinin və Naxçıvan Şəhər Polis İdarəsinin əməkdaşları, məktəbin pedaqoji kollektivi və şagirdlər iştirak ediblər.

Çıxış edənlər Azərbaycan Respublikasının əmək qanunvericiliyində azyaşlıların əmək fəaliyyətinə cəlb olunması ilə bağlı tələblər, habelə uşaq əməyinin istismarının və məcburi əməyin qarşısının alınması istiqamətində aparılan maarifləndirmə və nəzarət tədbirləri barədə ətraflı məlumat veriblər.

Sonda mövzu ilə bağlı şagirdlərin sualları cavablandırılıb və onlara əmək hüquqlarının qorunması istiqamətində düzgün davranış vərdişləri aşılanıb.