Salyanda əmək hüquqlarının qorunması və təhlükəsiz əmək şəraiti müzakirə olunub

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən Salyan rayonunda maarifləndirmə tədbiri təşkil olunub.

 

Tədbir “Əlilliyi olan şəxslərin əmək hüquqları” və “İş yerlərində əməyin mühafizəsi” mövzularına həsr edilib. Tədbirdə Xidmətin Şirvan-Salyan regional şöbəsinin əməkdaşları, həmçinin dövlət və özəl sektoru təmsil edən 40-a yaxın şəxs iştirak edib.

 

Çıxışlar zamanı əlilliyi olan şəxslərin əmək hüquqları, onların məşğulluq imkanları, eləcə də bu sahədə işəgötürənlərin öhdəlikləri barədə məlumat verilib. Bildirilib ki, əmək münasibətlərində bərabər imkanların təmin olunması, həssas qruplardan olan şəxslərin əmək hüquqlarının qorunması və iş yerlərində ayrı-seçkiliyə yol verilməməsi mühüm əhəmiyyət daşıyır.

 

Tədbirdə təhlükəsiz və sağlam əmək şəraitinin yaradılması, əməyin mühafizəsi üzrə mütəxəssislərin rolu, iş yerlərində bədbəxt hadisələrin və peşə xəstəliklərinin qarşısının alınması məsələləri də müzakirə olunub. Bu istiqamətdə qəbul edilmiş yeni standartlar, habelə sıfır qəza prinsipinə əsaslanan “Vision Zero” yanaşmasının ölkəmizdə tətbiqi istiqamətində görülən işlər barədə iştirakçılara məlumat verilib.

 

Maarifləndirmə tədbirində gender bərabərliyinin təşviqi, qadınların əmək hüquqlarının qorunması və qeyri-formal məşğulluğun qarşısının alınması məsələlərinə də toxunulub. Qadınların əmək bazarında bərabər imkanlara malik olması və öz əmək hüquqları barədə məlumatlılığının artırılmasının vacibliyi qeyd edilib.

 

Eyni zamanda, “İnsan Hüquqları Aylığı” çərçivəsində keçirilən tədbirdə uşaq əməyinin istismarının qarşısının alınması barədə də danışılıb. 18 may – 18 iyun tarixlərini əhatə edən “İnsan Hüquqları Aylığı”nın insan hüquqları sahəsində maarifləndirmə baxımından əhəmiyyəti iştirakçıların diqqətinə çatdırılıb.

 

Tədbirin sonunda iştirakçıların sualları cavablandırılıb və mövzular ətrafında fikir mübadiləsi aparılıb.