SƏTƏM mütəxəssisləri üçün keçirilən təlimlər davam edir

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti (DƏMX) tərəfindən SƏTƏM (sağlamlıq, əməyin təhlükəsizliyi və ətraf mühitin mühafizəsi) mütəxəssisləri üçün təlimlər davam etdirilir.

Növbəti təlim ixtisası qeyri-mühəndis olan SƏTƏM mütəxəssisləri üçün “Əməyin Mühafizəsi və Texniki Təhlükəsizlik” mövzusunda təşkil olunub. Təlim Dövlət Əmək Müfəttişliyi Xidməti, Xidmətin tabeliyindəki Əməyin Mühafizəsi Mərkəzi və “Quick Consulting Support” MMC əməkdaşlarının iştirakı ilə həyata keçirilib. Ümumilikdə 32 nəfər SƏTƏM mütəxəssisi bu təlimdə iştirak edib.

Təlim zamanı əməyin mühafizəsinin əhəmiyyəti, istehsalatda təhlükəsizliyin təmin olunması qaydaları, həmçinin əmək fəaliyyəti zamanı hüquq və vəzifələr barədə geniş məlumat təqdim olunub. Mütəxəssislər çıxışlarında əməyin mühafizəsi qaydalarının düzgün tətbiqinin əməkdaşların sağlamlığının qorunması və istehsalatda səmərəliliyin artırılmasında mühüm rol oynadığını vurğulayıblar.

Təlimlərin əsas məqsədi iş yerlərində baş verə biləcək bədbəxt hadisələrin qarşısının alınması, profilaktik tədbirlərin gücləndirilməsi, qanunvericilik tələbləri barədə məlumatlandırma, eləcə də əməyin mühafizəsi üzrə dövlət standartlarının tətbiqi prinsiplərinin izahı və sağlam, təhlükəsiz əmək şəraitinin yaradılması istiqamətində bilik və bacarıqların artırılmasıdır.