SXA və DTSERA-nın əməkdaşları üçün əməyin mühafizəsinə dair təlim keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən Nazirliyin tabeliyində Əmək Bazarı və Sosial Müdafiə Məsələləri üzrə Milli Observatoriya ilə birgə əməyin mühafizəsinə dair maarifləndirici təlim təşkil olunub.

Təlim Nazirliyin tabeliyində Sosial Xidmətlər Agentliyinin (SXA) və Dövlət Tibbi-Sosial Ekspertiza və Reabilitasiya Agentliyinin (DTSERA) əməkdaşları üçün keçirilib.

Tədbir çərçivəsində əməyin mühafizəsi sahəsində təhlükəsizlik qaydalarına əməl olunmasının vacibliyi, istehsalatda baş verə biləcək bədbəxt hadisələrin və peşə xəstəliklərinin qarşısının alınması istiqamətində həyata keçirilən profilaktik tədbirlər barədə ətraflı məlumat verilib.

Eyni zamanda, Əmək Məcəlləsinə edilmiş son dəyişikliklər, əməyin mühafizəsi mədəniyyətinin təşviqi, təhlükəsiz və sağlam əmək mühitinin formalaşdırılması, eləcə də hüquqi maarifləndirmə tədbirlərinin əhəmiyyəti müzakirə olunub. Təlim zamanı yeni qəbul edilmiş standartlar və “Vision Zero” yanaşmasına əsaslanan qabaqlayıcı təhlükəsizlik modeli barədə məlumat təqdim edilib.

Təlim interaktiv formatda keçirilib, iştirakçıları maraqlandıran suallar cavablandırılıb və fikir mübadiləsi aparılıb.